Lueg doch mau

Dez 2016
 

Di het’s preicht, du hesch blüetet,
u es tuet dir geng no weh,
e Sturm het gwüetet,
ds Läbe isch nid fair

Ufem Wäg, nach voore,            
grossi Tröim si blibe sii
Hesch gar verlore,
was dir lieb u wärt isch gsii

Doch itz lue e mau die Blueme aa,
u gspür wi d’Sunne wermä ma,
nüt isch eifach soo
u itz los wi d’Vögu singe tüe
u lue au dere Schönheit zue
du bisch Teil dervoo 

Geng di Gier, geng das Gäut,
bringt viu Schlächts u bringt viu Not
Uf dr Wäut
isch so mängs nümme im Lot

Wär isch tschuld, a däm Ganze,
u wär nimmt dr Wäut dä Schmärz
Guet u bös, ja die Gränze
louft dür jedes Mönsche-Härz   

Doch de lue di Chinderouge aa,
u d‘ Sunne au Tag nöi ufgah,
u häb e chli Muet
Ja tue dii doch chli beschänke la,
dis Härz vo nöiem offe ha,        
es chunnt sicher guet                 

Säg du mir, isch de ds Läbe nid o Gschänk?
Bi so froh, das mir da si            
Was mir si, hei mir üs o chli usdänkt,
chumm so schtig doch wider ii

U de lue e mau die Blueme aa,
u gspür wi d’Sunne wermä ma,
nüt isch eifach soo
u itz los wi d’Vögu singe tüe
u lue au dere Schönheit zue
du bisch Teil dervoo

©  Item