Fernseh

ar Nachtrueh z'lieb bi zum Abschied cho,
u ihm dür ne Chnopfdruck ha si Zouber gno,
hani gli druuf so ne Iidruck gha,
Fründe heige mi für geng verlah
Ä Lääri so gross isch de über mi choo,
u het am Fernseh's Platz iignoo

Sit mir aui z Gliiche gseh u ghöre,
bim stundelange Gaffe i die grossi Röhre,
wärde mir enang je lenger je gliicher,
das heisst ar Viufaut nid grad riicher,
so wi's d'Natur eigentlech vorgseh hätt,
doch geng im Biud sii, isch was mir wett
U statt die Wäut i ihrer Füui z'gseh,
si mir scho zfride mit 2D

So hani de vor churzem Znacht
däm Theater ändlech es Ändi gmacht
Im erschte Stock usä vor ds Fäischter gsteut,
da het är no mau so richtig kracht
D' Längwili chlopft sit denn a d'Tür,
doch gseht si dä Fride innefür,
flügt si ganz schnäu zum Nachbar Meier
un' ig i füehle mi dütlech freier